ബാഫഖിതങ്ങള്‍ സ്മാരക വൈദ്യശ്രേഷ്ഠ അവാര്‍ഡ് ഡോ. സി.കെ. രാമചന്ദ്രന് പാണക്കാട് സയ്യിദ് ബഷീറലി ശിഹാബ് തങ്ങള്‍ സമ്മാനിച്ചു. സര്‍വമേഖലയിലും പ്രകാശംപരത്തിയ വ്യക്തിത്വമായിരുന്ന തങ്ങള്‍, കേരളത്തിന്റെ ഭരണനിയന്ത്രണം നടത്തിയ വ്യക്തികൂടിയായിരുന്നുവെന്ന് ബഷീറലി തങ്ങള്‍ പറഞ്ഞു. ബാഫഖിതങ്ങള്‍ കേരള രാഷ്ട്രീയത്തിലെ കിങ്‌മേക്കറായിരുന്ന കാലത്ത് അദ്ദേഹവുമായി വൈയക്തികമായുണ്ടായ അടുപ്പം തന്റെ ജീവിതത്തിലെ അവിസ്മരണീയഘട്ടമാണെന്ന് ഡോ. സി.കെ. രാമചന്ദ്രന് പറഞ്ഞു.
അധ്യാപക അവാര്‍ഡ് ജേതാവ് പി.ടി. മുസ്തഫയ്ക്ക് എം.പി. വീരേന്ദ്രകുമാര്‍ ഉപഹാരം സമ്മാനിച്ചു. പി.എസ്.പി.ലീഗ് ഐക്യം കേരളരാഷ്ട്രീയത്തിന്റെ ഭാവിനിര്‍ണായക ശക്തിയായതിന് പിന്നില്‍ ബാഫഖി തങ്ങളുടെ നേതൃവൈഭവമാണെന്ന് എം.പി. വീരേന്ദ്രകുമാര്‍ അനുസ്മരിച്ചു. സമുദായത്തോടുള്ള പ്രതിബദ്ധതയോടൊപ്പം എല്ലാവരെയും കൂട്ടിയോജിപ്പിക്കുകയായിരുന്നു തങ്ങളെന്ന് അദ്ദേഹം പറഞ്ഞു.
ഹാഫിള് സയ്യിദ് ഹുസൈന്‍ ബാഫഖി ഖുര്‍ആന്‍ പാരായണം നടത്തി. ആറ്റക്കോയ പള്ളിക്കണ്ടി പുരസ്‌കാരജേതാവ് സി.കെ. രാമചന്ദ്രനെ പരിചയപ്പെടുത്തി. വിദ്യാഭ്യാസ സഹായവിതരണം മുസ്ലിംലീഗ് സംസ്ഥാന സെക്രട്ടറി എം.സി. മായിന്‍ഹാജി നിര്‍വഹിച്ചു. യൂത്ത്‌ലീഗ് സംസ്ഥാന പ്രസിഡന്റ് പി.എം. സാദിഖലി അനുസ്മരണപ്രഭാഷണം നടത്തി. ജില്ലാ പ്രസിഡന്റ് ഉമ്മര്‍ പാണ്ടികശാല, കാസര്‍കോട് ജില്ലാ സെക്രട്ടറി എം.സി. ഖമറുദ്ദീന്‍, വി.പി. ഇബ്രാഹിംകുട്ടി എന്നിവര്‍ സംസാരിച്ചു. സയ്യിദ് ഹസന്‍ ബാഫഖി സ്വാഗതം പറഞ്ഞു.
News @ Mahrubhumi
